«Motívanos conseguir que o espectador se identifique cos personaxes e se emocione coas súas historias.»
Virginia Curiá e Tomás Conde son unha parella de cineastas especializados en animación stop motion con personaxes modelados con plastilina. En 1994 finalizaron os seus estudos na Escola de Imaxe e Son da Coruña; alí realizaron o seu primeiro traballo de animación, Alegrías de Puerta Tierra, seleccionado polo Ministerio de Cultura como mostra de cine español no estranxeiro. Fundaron entón a produtora Algarabía Animación, e ata agora dirixiron e animaron catorce curtametraxes, dúas series, continuidade televisiva e campañas publicitarias para Gadis, Unicef, Inditex, MMT, Estrella Galicia, TVG, EVO Banco, Galicia Calidade e Cosmopolitan TV. Tamén dirixiron a longametraxe de animación 3D Meigallos.
